Mark 11
E Isu i Dili o Ierusalem
(Mateo 21:1-11; Lukas 19:28‑40; Ioanes 12:12-19)
1E Isu turana e huriki a murimuri vona, ri valai tabukoi o Ierusalem. Ri bele na tanga e Betpage, e Betani, na dahana lolo e Oliva. Lakea e Isu i rudu a murimuri vona ala rua, 2i taki rua i ta maea, “Muru muga lakea na tanga na ngalane marua. Na tahuna muru dili na tanga, bara muru masia a donki karaba ni topi, i uka tara viri ge rike vona ma. Muru pugea, muru lalu vilia. 3A viri tara ge nana, ‘I navai muru pugea a donki iea?’ Muru takia, ‘A Bakovi Dagi i tahoka a leho vona. I uka ma ge tabaka, bara i taparaki mulea.’”4Lakea ru vano, ru masia a donki karaba ni kolotata na dahana mataruma tabukoi na dala. Na tahuna ru pugea, 5e huriki a bakovi ranga ri pesi vonga, ri nana rua, “A ra muru ratea? I navai muru pugea a donki karaba?”
6Lakea ru koli manga a ngava e Isu i taki rua vona. Ri longo ne rua, ru vano. 7Ru lalua a tuna donki lakea ne Isu. Ru vulala rike vona a nirodo ne rua, lakea e Isu i made langa vona. 8E huriki ala kupo ri vulala puru na dala a nirodo ne ria, pali ranga ri putu a pagana rou na hania, ri vahata. 9 aE huriki ri muga, e huriki ri muri, ri lahihi rike, ri ta maea,
“Si gi kavurikea a Vure!
Ni gi kavurike a viri i valai na rane Bakovi Dagi.
10Ni gi kavurike a harikia ne tamane hita, e Davit, i valai ngane.
Si gi kavurikea a Vure Meli Liu!”
11E Isu i bele o Ierusalem, muri i lakea na roho na Vure. I laho vonga, i matai a maki lobo. Muri i tuli a murimuri vona ala ravulu a polona i rua, ri lakea o Betani a vuhuna i malunga liu pali a hini.
12Na parava muri ri pea e Betani, ri vano. E Isu i vitolo, 13 blakea i mata muga, i masia a kai a pik i buroro a pagana. Lakea i vano ge masia, i vona a kanena, o i uka. I bele vona, i masia i uka kanena. A pagana kunana, a vuhuna i uka ma a tahuna na kai a pik ge vua vona. 14Lakea i takia a kai, i ta maea, “I uka tara viri ge kani tabu a vuamu.” E huriki a murimuri vona ri longoa ra ngava i takia.
E Isu i Lili Tala e Huriki na Roho na Vure
(Mateo 21:12-17; Lukas 19:45‑48; Ioanes 2:13-22)
15Na tahuna ri bele o Ierusalem, e Isu i dili na tabeke na roho na Vure, i lili tala e huriki ri vakona, ri vahabi a maki. I pulo a dede ne huriki ri vangoli a moni, a gula ne huriki ri vahabi a balu. 16I ta pupukari ria vona, nahea ri gi kaloho a popou, ri gi dili na tabeke na roho na Vure. 17 cLakea i vara ria, i ta maea, “A ngava ni here puru na Hinere i ta maea,‘A roho nau ne vona e huriki a bakovi na tanga lobo ri gi vasileki vona.’
Pali mua mu ratea i manga a hini i haniu vona e huriki a panaho.”
18 dE huriki a prister dagi, a mari na vinara, ri longoa, ri vakatubu ni matakanea a dala ri gi rabalaki ia vona. Ri mangenge vona, a vuhuna e huriki lobo ri turutu na vinara vona.
19Na malunga ri pea a tanga dagi.
20Na hatelanga ri laho lokovonga, ri masia a kai a pik iea i malai liu, i tubu na kana, i rike liu na pagana. 21E Petrus i longovisia, lakea i takia e Isu, “Mari ni tovo! Mata lakea! Ra kai a pik o rudurahea, i malai pali!”
22Isu i koli, i ta maea, “Mu luhoi torea a Vure. 23 eA taki muholi mua, a viri tara bara i takia a lolo iea, ‘O malaga rike, o to na utu.’ pali i uka ma i loho rua, i luhoi torea a maki i taki ge bele, bara i bele. 24 fI mavonga, a taki muholi mua, na tahuna mu vasileki, a ra maki mu nana vona, mu luhoi tora manga mu bole pali, bara mu bole. 25 gNa tahuna mu vasileki, mu longovisi ranga naro hale ni rata virihi mua vona, mu lohopile, lakea e Tamane mua na hunu tara bara i puga a naro hale ne mua. 26Pali mua, i uka ma mu gu lohopile a naro hale na viri, e Tamane mua, ra i made na hunu, ia tara i uka ma ge puga a naro hale ne mua.”
E Rei i Habi a Nitora ne Isu
(Mateo 21:23-27; Lukas 20:1-8)
27E Isu turana e huriki a murimuri vona ri luve tabu o Ierusalem. Na tahuna e Isu i lalaho na roho na Vure, e huriki a prister dagi, a mari na vinara, turana e huriki a gare, ri masia, ri valai vona, 28ri nanea, “O bole vai a nitora o rata a maki nga? E rei i taki ioe go rata a maki nga?”29E Isu i koli, i ta maea, “Ga nana taro mua. Mua bara mu kolivisia a ninana iea, bara taki mua vona e rei a viri i habia nau a nitora, a rata a maki nga. 30A ninana nau i maea, ra hilova ne Ioanes, i valai na Vure, o i valai na bakovi tavula kunana? Mu vakalongo iau ngane!”
31Ri vata, ri ta maea, “Bara si takia a leho vona i valai na Vure, bara i nana, ‘Pali i navai i uka ma mu luhoi tora ia?’ 32Pali bara si takia a leho vona i valai na bakovi kunana, ra ngava iea tara i uka ma i kamumu.” Ri ta maea a vuhuna ri mangenge ne huriki. E huriki lobo ri luhoia e Ioanes, ta ia a propet. 33Lakea ri koli, ri ta maea, “I uka ma mi lohoka vona.” Lakea e Isu i ta maea, “Pali iau tara, i uka ma ga taki mua vona e rei a viri i habia nau a nitora ni rata a maki nga.”
Copyright information for
BNP